काठमाडौं । नागरिकता विधेयकका सम्बन्धमा रास्वपाका सभापति रवि लामिछानेले कुनै समूदायको विपक्षमा उभिएको भाष्य निर्माण गर्न खोजिएकोमा आपत्ति जनाएका छन् ।

बिहीबार आर्थिक वर्ष २०८०/८१ को बजेटमा टिप्पणी गर्नुपूर्व नागरिकता विधेयकलाई लिएर आफू र आफ्नो दलमाथि कुनै समूदायविरूद्ध उभ्याउन खोजिएकोमा उनले दुःख व्यक्त गरे । आफूले नागरिकता विधेयको कुनै विरोध गर्न नभइ प्रक्रियाको विषयमा विरोध जनाएको रविले स्पष्टिकरण दिए ।

‘म यो सम्मानित सदनमार्फत एक जिम्मेवार जनप्रतिनिधिको रूपमा नागरिकता विधेयकको विषयमा मेरो र दलको कुनै असहमति छैन । एकल आमाबाट जन्मेका छोराछोरीले नागरिकता पाउनुपर्छ भन्नेमा हाम्रो पनि पूर्णसहमत छ तर विधेयकबारे छलफल जसरी सदनमा छलफल हुनुपथ्र्यो त्यो भएन भनेर प्रक्रियागत कमजोरीको बारेमा मात्र विरोध जनाएको हो । यसमा हामीलाई कुनै समूदायको विरोधी भएको भाष्य निर्माण गर्न खोजिएकोमा म दुःख व्यक्त गर्न चाहन्छु’, उनले भने ।

सोमबार प्रधानमन्त्रीले नागरिकता विधेयक र भारत भ्रमणका सम्बन्धमा सदनलाई जानकारी गराउने विषयमा रास्वपाका सांसदहरू असंसदीय भाषा प्रयोग गरेका थिए । रविले आफ्ना सांसदको बचाउ गर्दै सरकाले दादागिरी देखाए चुप लागेर नबस्ने चेतावनी दिएका थिए ।