एजेन्सी । फिल्म ‘आई लभ यू’ जुन १६ मा जियो सिनेमामा रिलिज हुँदैछ । निखिल महाजन निर्देशित फिल्मको मूख्य भूमिकामा रकुल प्रीत सिंह,पावेल गुलाटी र अक्षय ओबेरोय देखिने भएका छन् ।

फिल्म प्रमोसनमा यतिबेला रकुल अन्तवार्तामा पनि व्यस्त छिन् । उक्त फिल्मलाई लिएर हालै एक अन्तर्वार्तामा रकुलले साढे दुई मिनेटको पानीको दृश्य खिच्न आफू १४ घण्टा पानीमुनि बस्नुपरेको बताएकी छन् ।

फिल्ममा उनको साढे दुई मिनेटको पानीमुनिकाे दृश्य छ । ‘मैले यो फिल्मको लागि अन्डरवाटर सिक्वेन्स शूट गर्नुपरेको थियो । यसका लागि मलाई आजान नामक स्कुबा प्रशिक्षकबाट तालिम दिइएको थियो। उहाँले मलाई दुई महिनासम्म साढे दुई मिनेट पानीमुनि श्वास राेक्न सिकाउनुभयो। यो दृश्यको सुटिङका ​​क्रममा दिउँसो २ बजेदेखि बिहान ४ बजेसम्म म पानीमा थिएँ ,’ उनले अन्तर्वार्तामा भनिन् ।

उनले यो दृश्य उनको लागि सबैभन्दा ठुलो चुनौती रहेको बताइन् । ‘म दिनभरि चिसो पानीमा उभिएँ। पानी धेरै चिसो थियो तर अन्य सदस्यहरूले मलाई चिसो हुनबाट जोगाउन लगातार तातो पानी खन्याइरहेका थिए,’ उनले थपिन् ।

पानीमा लामो समय बस्दा पानीमा रहेको क्लोरिनका कारण उनको आँखामा समस्या भएको उनले अन्तर्वार्तामा बताएकी छिन् ।