काठमाडाैं । सरकारले करिब तीन अर्ब रूपैयाँ अनुदान रकम भुक्तानी बन्द भएको कृषि बीमा तुरून्त सुचारू गर्न सांसद सरस्वती सुब्बाले अनुरोध गरेकी छिन् ।

बिहीबार प्रतिनिधि सभामा शून्य समयमा बोल्ने क्रममा उनले सो अनुरोध गरेकी हुन् । सरकारले २ अर्ब ९५ करोड बक्यौता भुक्तानी नगरेपछि बीमा कम्पनीहरूले कृषि बीमा बन्द गरेको थियो । सांसद् सुब्बाले कृषि बीमा गर्दा लाग्ने शुल्क अर्थात प्रिमियम ८० प्रतिशत नेपाल सरकराले व्योहोर्ने व्यवस्था  भएको उल्लेख गर्दै सो रकम भुक्तानी नहुँदा बीमा कम्पनीहरू पशु बीमा गर्न तयार नभएको बताइन् ।

उनले भनिन्, ‘कृषि बीमा दाबी गर्दा सबै कागजात बीमा प्राधिकरणमा बुझाउनुपर्ने व्यवस्था छ । यो कार्यका लागि कृषक चुकेका छैनन् । नेपाल सरकराले तिर्नुपर्ने बक्यैता तुरून्त निकास गरी बाली बीमा पशुधन बीमा सुचारू गरियोस् । बीमा कम्पनीलाइ बीमा गर्न तुरून्त निर्देशन गरियोस्  ।’

साथै उनले कृषि बीमा दाबी र भुक्तानी केन्द्रीयस्तरबाट स्थानीय तहबाटै मिलाउन पहल गर्न अनुरोध गरेकी छिन् ।