काठमाडौं । युरोकप छनोट खेलमा पोर्चुगलले ३–० गोलान्तरको सहज जित हात पारेको छ । गएराति सम्पन्न खेलमा बोस्निया एण्ड हर्जगोभिनालाई पराजित गर्दै पोर्चुगलले फराकिलो जित निकालेको हो ।

पोर्चुगलका बेर्नार्डो सिल्भाले खेलको ४४औं मिनेटमा पहिलो गोल गर्दै सुरुआती अग्रता दिलाएका थिए । ७७औं मिनेटमा ब्रुनो फर्नान्डेजले गोल गर्दै अग्रता दोब्बर बनाए । इन्जुरी समयमा फर्नान्डेजले फेरि अर्को गोल गरेर पोर्चुगललाई ३–० को अवस्थामा पुर्याए ।

खेलमा पोर्चुगलका स्टार खेलाडी क्रिस्टियानो रोनाल्डो पनि सहभागी थिए । पोर्चुगलका लागि उनको यो १९९औं खेल हो । तर उनले यो खेलमा कुनै गोल गर्न भने सकेनन् ।

जितसँगै समूह ‘जे’ को शीर्ष स्थानमा रहेको पोर्चुगल ९ अंक बनाएको छ । बोस्निया भने ३ अंक जोडेर चौंथो स्थानमा छ ।