काठमाडौं । निकिता पौडेलको नेतृत्वमा सञ्चालन हुन लागेको नारी टेलिभिजन भोलिबाट शुभारम्भ हुने भएको छ ।

नेपालमा पहिलो पटक महिलाका मुद्दा र विषयलाई प्राथमिकतामा राखेर प्रसारण हुन लागेको टेलिभिजन बुधबार बाजुराबाट शुभारम्भ गर्न लागिएको हो ।

बाजुराको बूढीगंगा नगरपालिकाबाट भोलि नारी टेलिभिजनको नियमित प्रसारण सुरु हुन लागेको पौडेलले  जानकारी दिइन् ।

नारी टेलिभिजनको शुभारम्भ गर्न निकिताका श्रीमानसमेत रहेका राष्ट्रिय स्वतन्त्र पार्टीका सभापति रवि लामिछाने त्यसतर्फ प्रस्थान गरेका छन् । निकितालाई हौसला प्रदान गर्न आफू त्यसतर्फ लागेको उनले सामाजिक सञ्जालमार्फत बताएका छन् ।

शुभारम्भ बाजुराबाट भए पनि यसको मुख्य कार्यालय भने काठमाडौंमा रहनेछ । महिला सशक्तीकरणका लागि टेलिभिजनले महिलाका विषय र मुद्दालाई प्राथमिकता दिएर सामग्री प्रसारण गर्ने जनाएको छ ।