काठमाडौं । प्रहरीले त्रिभुवन विमानस्थलबाट स्रोत नखुलेको विदेशी मुद्रासहित चारजनालाई पक्राउ गरेको छ ।

काठमाडौंबाट दुबई जान लागेका चार जनालाई सवा करोड नेपाली रुपैयाँ बराबरका विदेशी मुद्रासहित बुधबार राति पक्राउ गरेको हो ।

पक्राउ पर्नेमा हिमालय एयरलाइन्सको जहाजबाट दुबई जान लागेका सन्तोष पन्थी, दिपेश राना, सूर्यमणि भण्डारी र अनिश थापा रहेका छन् ।उनीहरुको साथबाट विभिन्न देशका १ लाख ६२ हजार भन्दा बढी विदेशी मुद्रा बरामद भएको छ ।

विमानस्थल प्रहरी स्रोतका अनुसार चेकजाँचका क्रममा अवैध मुद्रा भेटिएपछि उनीहरू चारैजनालाई विमानस्थल परिसरबाटै पक्राउ गरिएको हो ।

बुधबार नै राजस्व अनुसन्धान विभागले विमानस्थलबाट एक क्विन्टल सुन समेत बरामद गरेको छ । यो मुद्रा सुन तस्करीसँग जोडिएको गिरोहसँग साँठगाँठ भएको हुन सक्ने प्रहरीको आशंका छ ।