काठमाडौं । साउन १० गते यता प्रमुख प्रतिपक्षी दल नेकपा एमालेले संसदनमा अवरोध गर्दै आएको भन्दै सत्तापक्षले पनि विरोध जनाउन थालेका छन् ।

आजको प्रतिनिधिसभाको बैठकमा सत्ता पक्ष र प्रतिपक्षका सांसदहरू उभिएर बैठक सञ्चालनमा अवरोध गरे ।

शुक्रवारको बैठकको सुरुमै एमाले सांसदहरू विरोधमा उभिएपछि सभामुख देवराज घिमिरेले सांसद ज्वालाकुमारी साहलाई बोल्न दिए ।

सांसद साहलाई बोल्न समय दिएलगत्तै सत्तारुढ दलका सांसदहरुले उठेर विरोध गरे । त्यसपछि सभामुखले नियमको पालना गर्न आग्रह गरे पनि सत्तापक्षका सांसदहरुले सदन विपक्षीको मात्रै कुरा सुनेर अगाडि बढ्न नसक्ने भन्दै विरोध गरिरहे ।

उनीहरुको होहल्लाले ‘कुरा नसुनिएको’ भन्दै गर्दै सभामुखले साहलाई बस्न आग्रह गरेलगत्तै एमाले सांसदहरुले नारावाजी सुरु गरिहाले

त्यसपछि साउन २९ गते दिउँसो १ बजे बस्नेगरि स्थगित भयो । शुक्रबारको बैठक १५ मिनेट चलेको थियो ।

यसअघि आजै बसेको राष्ट्रियसभाको बैठक पनि एमालेको अवरोधका कारण स्थगित भएको थियो । राष्ट्रिय सभाको अब अर्को बैठक साउन ३१ गते १ बजे बस्ने छ ।

क्वीन्टल सुन तस्करी प्रकरणमा उच्चस्तरीय छानविन समिति बनाउन माग प्रमुख प्रतिपक्ष दल एमालेले साउन १० यता बैठकमा अवरोध गर्दै आएको छ ।