काठमाडौं । महालेखापरीक्षकका लागि आवेदन दिने म्याद सकिएको छ । प्रधानमन्त्री तथा मन्त्रिपरिषद्को कार्यालय स्रोतका अनुसार आइतबारको अन्तिम म्यादसम्म १६ जनाले महालेखापरीक्षकको लागि निवेदन दिएका छन् ।

सरकारले निवर्तमान महालेखापरीक्षक टंकमणि शर्मा दंगालको अवकाशसँगै रिक्त पदका लागि १५ दिने सूचना माग गरेको थियो ।
यो संवैधानिक नियुक्तीका लागि यतिबेला पूर्व सचिवदेखि बहालवाला सचिवको रस्साकस्सी चलिरहेको छ ।

६ वर्षका लागि कार्यकाल रहने यो पदमा दाबीका गर्नेहरूमा महालेखापरीक्षककै कार्यालयबाट महेश्वर काफ्ले, राममाया कुवँर, महालेखाका सचिव वामदेव शर्मा अधिकारी, सहसचिव चन्द्रकान्त भण्डारी बैकुण्ठ अधिकारी र अशोक कार्की रहेका छन् ।

त्यस्तै उक्त पदको दाबी गर्ने लाइनमा पूर्वसचिव तथा वहालवाला सचिवहरूमा गोपिनाथ मैनाली, शिशिरकुमार ढुंगाना, रामप्रसाद थपलिया, रामशरण पुडाशैनी, हरि बस्याल, शंकर खरेल, तोयाम राया र  बाबुराम गौतम छन् ।

चार्टर अकाउन्टेन्टको तर्फमा सुबोध कर्ण र हरि सिलवालको आवेदन परेको छ ।