काठमाडौं । सिंहदरबारमा सर्वदलीय बैठक सुरु भएको छ ।

संसदको गतिरोध अन्त्य गर्नेबारे छलफल गर्न राष्ट्रिय दलका शिर्ष नेता बैठकमा सहभागी भएका छन् ।

बैठकमा नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, राप्रपा र जनता समाजवादी पार्टीका नेताहरु सहभागी छन् ।

सुन तस्करी प्रकरणको अनुसन्धानका लागि उच्चस्तरीय आयोग गठनको माग गर्दै एमालेले १० साउनदेखि संसद बैठक अवरुद्ध गर्दै आएको छ । तर आयोग बनाउने सहमती पनि भइसकेको छ ।

सोमबार सत्ता र प्रतिपक्षी दलहरूले सुन प्रकरण छानबिन गर्न जाँचबुझ आयोग बनाउने सहमति गरेका थिए ।

यसको कार्यादेश र संरचनासहितको मस्यौदा पनि तयार भइसकेको छ ।

हिजोको बैठकमा कार्यदलले मस्यौदा बुझाउने र सर्वदलीय बैठकले त्यसलाई अन्तिम रूप दिने सहमति जुटेको भएपनि एमाले अध्यक्ष ओली नआएपछि बैठक बसेको थिएन् ।

मंगलबार जाँचबुझ आयोग बनाएर सदन चलाउने भने पनि दलहरूबीच सहमति हुन नसकेपछि प्रतिनिधिसभा बैठक आजका लागि सारिएको छ । संसद बैठक आज ३ बजेका लागि बोलाइएको छ ।