काठमाडौं । प्रमुख प्रतिपक्षी दल नेकपा एमाले कोशी प्रदेश सरकारविरुद्ध सर्वोच्च अदालत गएको छ ।

मुख्यमन्त्री उद्धव थापाले विश्वासको मत लिएको प्रक्रिया असंवैधानिक रहेको भन्दै एमालेले रिट दायर गरेको हो ।

एमाले कोशी प्रदेश संसदीय दलका नेता हिक्मतकुमार कार्कीले कोशी प्रदेश प्रमुख पर्शुराम खापुङ, मुख्यमन्त्री थापा, ४ भदौका सभाध्यक्ष इस्राइल मन्सुरी, अध्यक्ष मण्डकी सदस्य गीता तिम्सिना र प्रदेशसभा सचिवालयलाई प्रतिवादी बनाएर रिट दर्ता गरेका हुन् ।

मुख्यमन्त्री उद्धव थापाले सदनमा विश्वासको मत लिँदा सभाको अध्यक्षता गरेका व्यक्तीको पनि मत लिएको भन्दै त्यसविरुद्ध अदालत गएको हो ।

मुख्यमन्त्री थापाले गत सोमबार विश्वासको मत लिएका थिए । त्यस दिन सभाको अध्यक्षता कांग्रेस सांसद इस्राइल मन्सुरीले गरेका थिए । मन्सुरीले पनि थापालाई विश्वासको मत दिएका थिए ।

कार्कीले संविधानको धारा १६८ को उपधारा २ अनुसार गठन भएको सरकारले विश्वासको मत नपाएका कारण सोहि धाराको उपधारा ३ बमोजिम आफूलाई मुख्यमन्त्री नियुक्तिका लागि परमादेशको आदेश दिन माग गरेका छन् ।

थापा साउन १६ गते दोस्रो पटक मुख्यमन्त्री नियुक्त भएका थिए । त्यसअघि असार २१ मा मुख्यमन्त्री नियुक्त भएका थापा सर्वोच्चको आदेशपछि पद मुक्त भएका थिए ।

पहिलो पटक मुख्यमन्त्री नियुक्त हुँदा उनले सभामुखको हस्ताक्षर प्रयोग गरेका थिए । त्यसविरुद्ध एमाले सर्वोच्च गएको थियो ।