काठमाडौं । राष्ट्रिय स्वतन्त्र पार्टीका रवि लामिछानेलाई मोबाइल क्लिनिक सञ्चालनका लागि अनुमति दिन चितवनको कालिका नगरपालिकाले अस्वीकार गरेको छ ।

चितवन क्षेत्र नं. २ का सांसदसमेत रहेका लामिछानेले उक्त स्थानीय तहमा मोबाइल क्लिनिक सञ्चालन गर्न गत साउन २२ र २५ गते पत्र लेखेर अनुमति मागेका थिए । तर नगरपालिकाले कानून नभएको भन्दै सञ्चालन अनुमति दिन अस्वीकार गरेको हो ।

कालिका नगरपालिकाको स्वास्थ्य शाखाले घुम्ती स्वास्थ्य शिविर सञ्चालनको अनुमति दिने अधिकार प्रदेशसँग भएकाले सोहीअनुरूप गर्न सुझाव दिइएको जनाएको छ ।

प्रदेश जनस्वास्थ्य सेवा नियमावली, २०७७ मा घुम्ती शिविर सञ्चालनको स्वीकृत दिने क्षेत्राधिकार प्रदेश सरकारसँग रहेको उल्लेख छ ।

चितवन क्षेत्र नं. २ बाट दोस्रो पटक सांसदमा निर्वाचित भएको १०० दिनको अवसरमा गत साउन १६ बाट लामिछानेले मोबाइल घुम्ती स्वास्थ्य शिविर सञ्चालन गरिरहेका छन् । तर कानूनी र प्रक्रियागत त्रुटिका कारण यो अभियान एकपछि अर्को विवादमा पर्दै आएको छ ।