NepalWatch

News Portal For Eeverything In Nepal from Nepal

२०८० फागुन ११ गते

ठेक्का सम्झौता भैसकेपछि नदीजन्य पदार्थमा राजस्व छुट दिने मेयरसहित १० विरूद्ध मुद्दा

काठमाडौं। अख्तियार दुरूपयोग अनुसन्धान आयोगले कञ्चनपुरस्थित भीमदत्त नगरपालिकाका मेयर सुरेन्द्रबहादुर विष्ट र तत्कालिन निमित्त प्रमुख प्रशासकीय अधिकृत हरिदत्त जोशीसहित १० जना विरूद्ध मुद्दा दायर गरेको छ ।

उनीहरूले आर्थिक वर्ष २०७६/०७७ मा महाकली नदीको ढुंगा, गिट्टी, बालुवा, ग्राभेल र माटोको रोयल्टीमा भ्रष्टाचार गरेको आरोपसहित आज विशेष अदालत काठमाडौंमा मुद्दा दायर भएको हो ।

मेयर विष्टको अध्यक्षतामा बसेको नगरसभाको बैठकले नदीजन्य पदार्थमा राजस्व छुट दिने निर्णय भएको पाइएको छ ।

जब कि ठेक्का सम्झौतापछि नगरकार्यपालिकाको कार्यालयलाई बुझाउनुपर्ने ठेक्का रकममा कुनै पनि किसिमको छुट वा मिनाहाको लागि दाबी गर्न पाइदैन ।

योसँगै सम्झौता भइसकेको ठेक्कामा कुनै पनि अवस्थामा छुट दिन नपाइने व्यवस्था छ ।

तर यो व्यवस्थालाई लत्याएर मेयर विष्टले नगरसभाबाट गठित कार्यदलको सिफारिसमा एक करोड ३४ लाख ९७ हजार ४५६ रुपैयाँ छुट दिने निर्णय गर्यो ।

ठेक्का सम्झौतामै तोकिएअनुसार राजस्व नउठाएर एक करोड ३४ लाख ९७ हजार ४५३ रुपैयाँ राजस्व चुहावट गरेको आयोगको निष्कर्ष छ ।

उनीहरूलाई सोही रकम बिगो कायम गरी चुहावट भएको राजस्वको दोब्बर जरिवानाको मागसहित आज भ्रष्टाचार मुद्दा दायर भएको हो ।