काठमाडौं । काठमाडौं महानगरपालिकाका प्रमुख (मेयर) बालेन शाहले संघीय सरकारले महानगर वा आसपासमा १०० रोपनी जग्गा उपलब्ध गराए रंगशाला निर्माण गर्न पहल गर्ने बताएका छन् ।

एसिया कप क्रिकेट अन्तर्गत नेपाल र भारतबीचको खेल हेर्न श्रीलंका पुगेका बालेनले मंगलबार सामाजिक सञ्जालमा एक पोस्ट् लेख्दै यस्तो बताएका हुन् ।

‘नेपाल सरकारले काठमाडौं महानगर वा आसपासमा आवश्यक १०० रोपनी जग्गा उपलब्ध गराउँछ भने काठमाडौं महानगरबाट रंगशाला बनाउन हामी पहल गर्नेछौं,’ उनले सामाजिक सञ्जालमा लेखेका छन् ।

यस्ता रंगशाला निर्माण गर्दा खेल विकास हुनुका साथै आर्थिक रूपमा समेत लाभ मिल्ने उनको भनाइ छ ।

खेलाडी र तल्लो तहमा सुविधाका लागि अबको तीन वर्षमा सकेसम्म हरेक वडामा एक वटा रहने गरी बलिङ स्टेशन राख्ने प्रबन्ध पहिले नै गरिसकेको उनले जानकारी दिए ।