काठमाडौं । नेपाल क्रिकेट संघ (क्यान) को नयाँ नेतृत्वका लागि आज शनिबार निर्वाचन हुँदैछ ।

निर्वाचनका लागि नयाँबानेश्वरको एभरेष्ट होटलमा मतदान हुँदैछ । मतदान प्रक्रिया १२ बजेपछि सुरु हुने निर्वाचन समितिले जनाएको छ ।

क्यानको अध्यक्षमा चतुरबहादुर चन्द र विनयराज भण्डारीले प्रतिस्पर्धा गर्दैछन् । अध्यक्षका दाबेदार चन्दको प्यानलमा नेपाली क्रिकेट टोलीका पूर्व कप्तान पारस खड्काले सचिव पदमा उम्मेदवारी दिएका छन् । उनले भण्डारी पक्षबाट सचिवमा क्यानका केन्द्रिय सदस्य प्रशान्त विक्रम मल्लसँग प्रतिस्पर्धा गर्नेछन् ।

क्यानको चुनावमा कुल ८४ मतसंस्था रहेको छ । मतसंख्या ८५ रहेपनि प्रतिनिधि विवादको कारण झापा जिल्लाको मताधिकार काटिएकाले अब कुल मतसंख्या ८४ रहेको हो।

क्यानको कुनै पनि पदमा चुनाव जित्न न्युनतम ४३ मत आवश्यक पर्दछ ।