काठमाडौं । नेपाली राष्ट्रिय क्रिकेट टोली आज चीन जाने भएका छन् । एसियाली खेलकुदमा सहभागिताका लागि नेपाली टोली आज त्यसतर्फ जान लागेको हो ।

नेपाली क्रिकेट टोली आइतबार मध्याह्न साढे १२ बजे चाइना एअरलाइन्सको उडानमार्फत चीन जान लागेको नेपाल क्रिकेट संघ (क्यान) ले जनाएको छ ।

क्यानले एसियाली खेलकुदमा भाग लिन जाने खेलाडीलाई आइतबार बिहान बिदाई गरेको छ । राजधानीमा आयोजित एक कार्यक्रममा क्यानका नवनिर्वाचित अध्यक्ष चतुरबहादुर चन्द, सचिव पारस खड्कालगायत पदाधिकारीले नेपाली क्रिकेट टोलीको बिदाई गरेका हुन् ।

किशोरी बलात्कार आरोपमा अदालतमा मुद्दा खेपेका सन्दीप लामिछाने भने आज नजाने भएका छन् । सन्दीपविरुद्धको मुद्दामा जिल्ला अदालत काठमाडौंले आजै पेशी तोकेको छ ।

अदालतको निर्णय हेरेर सोमबार उनलाई चीन पठाउने क्यानको तयारी छ ।