काठमाडौं । काठमाडौं महानगरपालिकाका मेयर बालेन साहले अभियन्ताहरू उभिरहेको ठाउँमा आफैँ गएर वार्ता गरौँ भन्दा पनि नआएको दाबी गरेका छन् ।

सोमबार सामाजिक सञ्जाल फेसबुकमार्फत मेयर बालेनले लोकतान्त्रिक अभ्यासमा सबै कुरा समाधान संवादबाट नै हुनुपर्ने बताउँदै आन्दोलनमा रहेका अभियन्ताहरु राजनीतिक स्वार्थ जोडिएर वार्तामा आउन नखोजेको बताएका छन् ।

उनले लेखेका छन्, ‘बिगत केही दिन देखि केही अभियानताहरू आन्दोलनमा हुनुहुन्थ्यो, उहाँहरुको कुरा सुन्न उहाँहरु उभिरहेको ठाउँमा म आफै गएर वार्ता गरौँ यहाँहरुको कुरा र समस्या सुनौँ भन्दा अभियनतहरु संवादमा बोलाउदा आउन खोज्नु भएन । लोकतान्त्रिक अभ्यासमा सबै कुरा समाधान संवादबाट नै हुनुपर्छ भन्ने कुरा हामीले बुझेको छौँ, सायद कुनै राजनितिक स्वार्थ जोडिएर आउन नखोज्नु भएको होला भन्ने हामीले बुझेको छौँ । के वार्ता हामीले उहाँहरुको नेता सङ गर्न पर्ने ?’

मेयर बालेन साहलाई चुनावी बाचा सम्झाउन सात दिनदेखि राष्ट्रिय सभागृह अगाडि अभियन्ता ईः ले उभिएर विरोध प्रदर्शन गर्दै आएका छन् । उनीहरुले काठमाडौं महानगरले फुटपाथ व्यवसायीहरुलाई बलपूर्वक हटाएपछि झण्डै तीन महिनादेखि ‘गरिबको चमेली बोलदिने कोही छैन’ अभियान चलाइरहेका छन् ।

ईःका अनुसार अहिले महानगरको नेतृत्वमा रहेका जनप्रतिनिधिहरुले फुटपाथ र त्यहाँ व्यवसाय गरिरहेकाहरुको सहज व्यवस्थापन गर्ने बाचा गरेका थिए । तर नेतृत्वमा पुगेपछि ठीक विपरीत व्यवहार देखिएको भएको भन्दै उनीहरु आन्दोलित भएका हुन् ।