काठमाडौं । १९औँ एसियन खेलकुद अन्तर्गत पदकको आश गरिको इ स्पोर्ट्सको एलिटको रुपमा रहेको पब्जी मोबाइलमा पनि नेपालले हार ब्यहोरेको छ । पब्जी मोबाइलमा नेपाली टोली सेमिफाइनलबाट बाहिरिएको हो ।

शनिबार बिहान चाइना हाङझाउ इस्पोर्ट्स सेन्टरमा भएको सेमिफाइनल चरणको समूह ‘ए’ मा दक्षिण कोरिया र चाइनिज ताइपेईसँग पछि पर्दै नेपाल तेस्रो स्थानमा रहेको हो । समूह ‘ए’को चार टोलीमा जापान अन्तिम स्थानमा रह्यो ।

नेपालले ५४ मिनेट ३३ दशमलव ३४६ सेकेन्डको समय निकाल्यो । नेपाल भन्दा अघि रहेको ताइपेले ५२ मिनेट १९ दशमलव ३९३ सेकेन्ड र शीर्ष स्थानको कोरियाले ५० मिनेट ३७ दशमलव १५१ सेकेन्डको समय निकाल्यो भने चौथों स्थानमा रहेको जापानले ५४ मिनेट ४२ दशमलव ५३१ सेकेन्डको समय निकालेको थियो ।

नेपाली टिममा सुबिनकुमार प्रजापति, दिपेश गुरुङ, साहस भण्डारी, समिर गुरुङ र संगिन भट्टराई थिए ।