काठमाडौं । सुदूरपश्चिममा भूकम्पको धक्का महसुस भएको छ । आज दिउँसो सुदूरपीश्चमका तराई र पहाडी जिल्लामा भूकम्पको धक्का महसुस भएको हो ।

भूकम्प मापन केन्द्र सुर्खेतले बझाङको तलकोट केन्द्रबिन्दु भएर दिउँसो २ बजेर ४१ मिनेटमा ५.३ म्याग्नेच्युटको भुकम्प गएको जानकारी दिएको छ ।

कैलाली, डोटी, डडेल्धुरा, बैतडी, बाजुरालगायतका जिल्लामा हल्लाएको अनुभूति भएको स्थानीयले उल्लेख गरेका छन् ।

बैतडीको मेलौली नगरपालिका ८ का वडा अध्यक्ष तपेन्द्रजंग विष्टले जिल्लामा भूकम्पको धक्का महसुस भएको जानकारी दिए ।

सामाजिक सञ्जाल फेसबुकमा वडाध्यक्ष विष्टले यसको जानकारी दिएका छन् ।

उनले लेखेका छन्, ‘यता हाम्रो मेलौली तिर भुकम्पको ठूलो झट्का महसुस भयो । कृपया सबै सुरक्षित स्थानमा बस्नुहोला । आफ्नो आसपासमा कतै क्षती भएमा उद्धारमा सहयोग गर्नुहोला ।’