काठमाडौं । नेपाली महिला फुटबल टिमकी खेलाडी सावित्री भण्डारी (साम्बा) इजरायलबाट स्वदेश फर्केंकी छन् ।

व्यावसायिक फुटबल खेल्न इजरायल पुगेकी उनी त्यहाँ युद्ध चर्किएपछि स्वदेश फर्किएकी हुन् ।

साम्बाले बुधबार सामाजिक सञ्जालमा एक पोस्ट् गर्दै आफू सकुशल नेपाल आएको जनाएकी छन् ।

हमास विद्रोहीले हठात् इजरायलमाथि आक्रमण गरेपछि त्यहाँ ठूलो धनजनको क्षति भएको छ । लर्न एण्ड अर्न कार्यक्रमअन्तर्गत गएका नेपालका १० विद्यार्थीको सोही घटनामा परी मृत्यु भएको छ । युद्ध चर्किने संकेत देखिएपछि स्वदेश फर्कंन चाहने इजरायलमा रहेका नेपालीको उद्धारका लागि नेपाल वायु सेवा निगमको जहाज त्यसतर्फ गएको छ । उनीहरूको बिहीबार उद्धार हुने बताइएको छ ।