काठमाडौं । अदालतबाट सुनाइएको कैद भुक्तान नहुँदै राष्ट्रपति रामचन्द्र पौडेलबाट आममाफी पाएर रिहा भएका एक व्यक्ति २५ दिनमै महिलाको हत्या गरेका छन् ।

रुकुम पश्चिमको सानीभेरी गाउँपालिका–९, सिम्लीका ३३ वर्षीय लोकेन्द्र भनिने लोकबहादुर विकले आममाफी पाएर छुटेको २५ दिनमै महिलाको हत्या गरेका हुन् ।

बहुविवाहको मुद्दामा दोषी ठहर गर्दै अदालतले ११ महिना कैद सुनाएकोमा उनी ६ महिनामै संविधान दिवसका अवसरमा राष्ट्रपतिबाट आममाफी पाएर रिहा भएका थिए । उनै विकले मंगलबार मुसीकोट नगरपालिका–७, साँखकी २८ वर्षीया भावना विकको खलंगास्थित सत्कार होटलमा हत्या गरेका हुन् ।

हत्या आरोपमा बुधबार पक्राउ गरी विकलाई प्रहरीले सार्वजनिक गरेको छ ।

आगामी १९ माघमा कैदमुक्त हुुनुपर्ने उनलाई सात महिना १२ दिन कैद भुक्तान गरेको र असल चालचलन रहेको भनी राष्ट्रपतिबाट बाँकी कैद मिनाहा गरिएको थियो  ।

सत्कार होटलको कोठा नं. १ मा भावनाको शव फेला परेपछि गरिएको अनुसन्धानमा उनको संलग्नता देखिएको दाबी प्रहरीको छ । प्रहरीका अनुसार बयानका क्रममा उनले भावनाको हत्या गरेको स्वीकार गरेका छन् ।