काठमाडौं । टि–ट्वान्टी विश्वकप छनोटको एसिया क्षेत्रको उपाधिका लागि आज नेपाल र ओमानबीच फाइनल खेल हुँदैछ ।

अर्को वर्ष हुने आइसिसी टी–२० विश्वकपमा स्थान पक्का गरेका दुई देशबीच आइतबार बिहान ११ बजे कीर्तिपुरस्थित त्रिवि अन्तर्राष्ट्रिय क्रिकेट मैदानमा खेल हुन लागेको हो ।

आजको खेलमा दुवै टिम जितको खोजीमा हुनेछन् । यसअघि एसिया छनोटमा एउटै समूहमा रहेका यी दुईबीचको प्रतिस्पर्धामा नेपाल ५ रनको झिनो अन्तरमा ओमानसँग पराजित भएको थियो । त्यसैले नेपाल आजको खेलमा ओमानसँग बदला लिन चाहन्छ । त्यसो त, टी–२० आईमा ओमानभन्दा नेपाल अघि छ । यी दुई टोलीबीच हालसम्म पाँच खेल सम्पन्न हुँदा नेपालले तीन र ओमानले दुई खेल मात्र जितेको छ ।