काठमाडौं । मधेस प्रदेश सरकारले आज संघीय सरकारविरुद्ध आन्दोलन घोषणा गर्ने भएको छ । देश संघीयतामा गएपछि पहिलो पटक प्रदेश सरकारले संघ सरकारविरुद्ध यसरी आन्दोलन घोषणा गर्न लागेको हो ।

मधेस प्रदेशले प्रहरी समायोजन, निजामति ऐन अघि बढाएर कार्यान्वयन हुनुपर्ने माग राखेको छ । आफ्नो मागअनुसार संघ सरकार अघि नबढेपछि मधेस सरकारले बुधबार आन्दोलन घोषणाको तयारी गरेको हो ।

मधेस प्रदेश मुख्यमन्त्रीको कार्यालयले अहिले दिउँसो २ बजे मुख्यमन्त्री तथा मन्त्रिपरिषद कार्यालयमा पत्रकार सम्मेलन आयोजना गरेर आन्दोलन घोषणा गरिने जनाएके छ ।

बुधबार आन्दोलन घोषणा गरेर मुख्यमन्त्री सरोज यादवले बिहीबार प्रधानमन्त्री पुष्पकमल दाहाललाई आफ्ना मागबारे अवगत गराउन ज्ञापनपत्र बुझाउने तयारी गरेका छन् ।

ज्ञापनपत्र बुझाएर १५ दिने अल्टिमेटम दिने र उक्त अवधिमा पनि माग पूरा नभए माइतीघर मण्डलामा धर्ना बस्ने मधेस प्रदेश सरकारको चेतावनी छ ।