काठमाडौं । नेपाल विद्युत् प्राधिकरणले थप १४ उद्योगको विद्युत् लाइन काटिदिएको छ । प्राधिकरणको बिजुली उपभोग गरेबापतको महसुल लामो समयदेखि भुक्तानी नगरेपछि प्राधिकरणले यी उद्योगहरूको विद्युत् कटौती गरिदिएको हो ।

डेडिकेटेड फिडर एवं ट्रंक लाइनबाट विद्युत उपभोग गरेर प्रिमियमसहितको महसुल नतिरेका थप १४ उद्योगको विद्युत् आपूर्ति बन्द गरेको नेपाल विद्युत् प्राधिकरणले जनाएको छ ।

यी उद्योगको बक्यौता पाँच करोडभन्दा माथि रहेको बताइएको छ ।

लामो समयदेखि विद्युत् उपभोगबापतको महसुल नबुझाएपछि नेपाल विद्युत् प्राधिकरणले कठोर नीति लिँदै विद्युत् आपूर्ति बन्द थालेको छ । यसअघि ५९ उद्योगको पनि प्राधिकरणले बिजुली काटिदिएको थियो ।