काठमाडौं । देशका तीन प्रदेशमा बिहीबार बिहान वर्षा भएको छ । थप केही प्रदेशमा पनि बिहीबार दिउँसो वर्षा हुने आकलन गरिएको छ ।

मौसम पूर्वानुमान महाशाखाका अनुसार, सुदूरपश्चिम प्रदेशको धेरै र कर्णाली प्रदेशका थोरै स्थानमा अहिले फाटफुटदेखि हल्का वर्षा भइरहेको छ । लुम्बिनी प्रदेशका एक–दुई स्थानमा पनि लामो समयपछि पानी परेको छ ।

यी प्रदेशमा बिहीबार दिउँसो पनि छिटफुटदेखि हल्का वर्षा हुने आकलन महाशाखाले गरेको छ ।

सुदूरपश्चिम, कर्णाली र गण्डकी प्रदेशको उच्च पहाडी तथा हिमाली भू–भागका केही स्थानहरूका साथै बाँकी उच्च पहाडी तथा हिमाली भू–भागका थोरै स्थानहरूमा चाहिँ हल्का देखि मध्यम हिमपातको सम्भावना छ ।

देशका विभिन्न भागमा लामो समयपछि वर्षा भए पनि काठमाडौंमा आगामी तीन दिन पानी पर्ने सम्भावना छैन । महाशाखाले बिहीबार सार्वजनिक गरेको मौसमी बुलेटिनमा देशका विभिन्न भागमा वर्षाको आकलन गरिए पनि बागमती प्रदेशमा गरिएको छैन ।

अहिले नेपालको मौसममा पश्चिमी वायुको प्रभाव रहेको छ । विभिन्न स्थानमा भएको बदली, वर्षा र हिमपातले तापक्रम घटेको छ । तराई क्षेत्र हुस्सु र कुहिरोले ढाकिँदा जनजीवन प्रभावित भएको छ ।