विराटनगर । भारतीय नम्बर प्लेटको स्करपियो गाडीमा सुनसरीको इनरुवाबाट प्रहरीले एक करोड ८२ लाख ५१ हजार नक्कली नोट बरामद गरेको छ ।

नेपाली १ हजार दरका नक्कली नोटहरू बरामद गरेको सुनसरी प्रहरीले जनाएको छ ।

आइतबार भारतीय गाडीमा राखेर ल्याउँदै गरेको अवस्थामा इनरुवा नगरपालिका-४ स्थित सुनसरी खोलाको पुलनजिकबाट नक्कली नोट बरामद भएको हो ।

शङ्कास्पद अवस्थाको स्कारपियो गाडी खानतलासी गर्दा पछाडिको भागमा लुकाइछिपाई ल्याइएको नक्कली नोटहरू बरामद भएको हो ।

स्कारपियोको पछाडिको भागमा बोराभित्र झोलामा राखेर ल्याइएको अवस्थामा नक्कली नोट फेला परेको थियो । प्रहरीले स्कारपियो चालक भारत वीरपुरका २२ वर्षीय मोहमद सैयदलाई पक्राउ गरेको छ । स्कारपियोमै सवार रहेका अर्का व्यक्ति फरार छन् ।