काठमाडौं । चार प्रदेशमा आज पानी पर्ने प्रक्षेपण गरिएको छ । उच्च पहाडी भूभागमा भने हिमपातको सम्भावना छ ।

मौसम पूर्वानुमान महाशाखाका अनुसार, मौसममा अहिले पश्चिमी वायुको प्रभाव रहेको छ । यही कारण देशका पहाडी भूभागमा आंशिक बदली रही बाँकी भूभागको मौसम सफा छ ।
तराईका थोरै स्थानमा हुस्सु र कुहिरो लागेको छ ।

आइतबार दिउँसो चार प्रदेशमा वर्षाको आकलन छ । मौसमविद्का अनुसार कोशी, गण्डकी, कर्णाली र सुदूरपश्चिम प्रदेशको पहाडी भूभागका एक–दुई स्थानमा फाटफुटदेखि हल्का वर्षाको सम्भावना छ ।

उच्च पहाडी तथा हिमाली भागका एक दुई स्थानमा भने आज हल्का हिमपात हुनसक्छ ।

मौसम पूर्वानुमान महाशाखाको तीनदिने मौसम बुलेटिनअनुसार आगामी तीन दिन सुदूरपश्चिम, कर्णाली र लुम्बिनी प्रदेशमा वर्षाको योग छ । बागमती प्रदेशमा भने आगामी तीन दिन पानी पर्ने सम्भावना देखिएको छैन ।