काठमाडौं ।बिना जानकारी लामो समयदेखि गैरहाजिर रहेपछि प्रहरी प्रधान कार्यालयले विभिन्न तहका १८ प्रहरीलाई सातदिने स्पष्टीकरण सोधेको छ । आफूखुसी कार्यालयमा गैरहाजिर रहेका कर्मचारीको नाम टाँसे पनि सम्पर्कमा नआएपछि प्रधान कार्यालयले स्पष्टीकरण सोधेको हो ।

लामो समयदेखि बिना जानकारी गैरहाजिर रहेकाहरूमा प्रहरी सहायक निरीक्षक गजेन्द्र सिंह ठगुन्ना, प्रहरी वरिष्ठ हवल्दार धनबहादुर भुजेलदेखि प्रहरी कार्यालय सहयोगी शेरबहादुर गिरीसम्म छन् ।

प्रधान कार्यालयले सन्तोषजनक स्पष्टीकरणसहित सम्पर्कमा आउन अनुरोध गर्दै अन्यथा प्रहरी नियमावली, २०७१ को अनुसूची १४ को भाग ४ अनुसार कारबाही हुने चेतावनी दिएको छ । प्रहरी ऐनमा कुनै पनि कर्मचारी बिना जानकारी ९० दिनभन्दा बढी गैरहाजिर रहेमा सेवाबाट हटाउन सकिने व्यवस्था छ । ऐनको सोही प्रावधानअनुसार प्रधान कार्यालयले प्रक्रिया अघि बढाएको हो ।

नेपाल प्रहरीमा विशेषगरी तल्लो तहमा बीचमै जागिर छाड्ने समस्या बढ्दै गएको छ । न्यून वेतन, पेन्सन अवधि, आकर्षक वैदेशिक रोजगारी यसको मूल कारण मानिन्छ ।