काठमाडौं । तीन प्रदेशमा आइतबार पानी पर्ने आकलन गरिएको छ । उच्च पहाडी तथा हिमाली भूभागमा भने हिमपातको खतरा छ ।

मौसम पूर्वानुमान महाशाखाले आइतबार बिहान आफ्नो नियमित मौसमी बुलेटिन सार्वजनिक गर्दै तीन प्रदेशमा वर्षाको प्रक्षेपण गरेको हो । महाशाखाका अनुसार आज कोशी, बागमती र गण्डकी प्रदेशका पहाडी भूभागका थोरै स्थानहरूमा तथा बाँकी पहाडी भूभागका एक दुई स्थानमा मेघगर्जन, चट्याङसहित हल्का वर्षाको सम्भावना छ ।

त्यस्तै, देशको उच्च पहाडी तथा हिमाली भूभागका एक दुई स्थानमा हल्का हिमपातको सम्भावना छ ।

नेपालमा अहिले पश्चिमी न्यून चापीय प्रणाली तथा उत्तर पूर्व आसाम र आसपास क्षेत्रमा रहेको न्यून चापीय प्रणालीको प्रभाव रहेको छ । यही मौसमी प्रणालीका कारण केही दिनयता देशका विभिन्न भागमा वर्षा तथा बदली भइरहेको छ ।