काठमाडौं । नेपाल प्रहरी र सशस्त्र प्रहरीको जवान पदको प्रतीक्षा (वैकल्पिक) सूचीमा परेकालाई काठमाडौं महानगरपालिका (कामपा) ले नगर प्रहरीको जवान पदमा  अवसर दिने भएको छ ।

यी दुई प्रहरी संगठनले ०७७ सालदेखि अहिलेसम्म गरेको पदपूर्ति प्रक्रियामा जवानतर्फ वैकल्पिक सूचीमा परेकालाई कामपाले नगर प्रहरीको जवान पदमा जागिर दिने भएको हो ।

वैकल्पिक सूचीमा परेका सबैलाई यस्तो अवसर दिन लागिएको हो कि सीमितलाई भन्नेबारे भने कामपाले विस्तृतमा खुलाएको छैन ।

प्रहरी संगठनको प्रतीक्षा सूचीमा परेकालाई नगर प्रहरीको करार सेवामा नियुक्ति दिन कामपाले सूची संकलन समेत थालेको छ ।  गृह मन्त्रालयलाई एक लेखेर कामपाले ०७७ यता प्रतीक्षा सूचीमा परेकाको विद्युतीय कपी  मागेको हो ।

आफैंले प्रक्रिया थालेर नयाँ भर्ना गर्न झन्झटिलोसँगै खर्चिलोसमेत हुने भएकाले कामपाले सुरक्षा संगठनको वैकल्पिक सूचीमा परेकाबाट नगर प्रहरी लिने नीति अख्तियार गर्दै आएको छ ।  यसअघि पनि नगर प्रहरीको जवान पदमा सुरक्षा संगठनको प्रतीक्षा सूचीमा परेकासँग आवेदन आह्वान गरेर नियुक्ति गरेको थियो ।