काठमाडौं । एकीकृत समाजवादीका अध्यक्ष माधव कुमार नेपाल विपक्षी दलहरुको बैठकमा सहभागी भएपछि सत्ता गठबन्धनमा तरंग उत्पन्न भएको छ । कांग्रेस सभापति शेरबहादुर देउवाले बुधबार बोलाएको बैठकमा उनी सहभागी भएका हुन् ।

देउवा निवासमा भएको बैठकमा नेपालसहित उपेन्द्र यादब र महन्त ठाकुर सहभागी थिए । मधेस प्रदेशमा  जनता समाजवादी नेपालका मुख्यमन्त्री सरोज यादब नेतृत्वको सरकारलाई जोगाउन सो बैठक बसेको बताइएपनि विपक्षीको बैठकमै सहभागी भएपछि नेता नेपालमाथि आशंका बढेको छ ।

एकीकृत समाजवादीले साथ दिएमा मधेस सरकार जोगिने सम्भावना छ । त्यसैका लागि देउवाले उनलाई फकाएका हुन् । यसरी समाजवादीलाई साथ लिएर अघि बढ्दा वर्तमान गठबन्धन पनि फुटाउन सकिने देउवाको विश्वास छ ।

यसअघि उपेन्द्र यादब र माधव नेपालसँग मिलेर देउवाले यो सरकार गिराएर बैकल्पिक गठबन्धन बनाउने प्रयास गरेका थिए । तर, जसपा फुटेपछि असफल भएको थियो ।

एकीकृत समाजवादीले दुवै गठबन्धनसँग बार्गेनिङ गर्दै आएको छ । समाजवादीले समर्थन फिर्ता लिएलगत्तै वर्तमान सरकार ढल्ने अवस्था छैन तर झिनो बहुमत हुने भएकाले सरकार कमजोर हुने अवस्था छ । वर्तमान गठबन्धनसँग वार्गेनिङ गरेर समाजवादीले सुदुरपश्चिममा मुख्यमन्त्री समेत लिएको छ । दुवैतर्फ बार्गेनिङ गरेर अधिकतम लाभ लिने रणनीति एकीकृत समाजवादीको छ ।