कविता : जीवन पनि एक बेरुजु रहेछ
जीवन पनि एक बेरुजु रहेछ
मेरो आफ्नै मन,
मन भित्रको मन पनि त बेरुजु रहेछ,
कति कुरा समयमै फर्छौट नगरी
बेरुजु बनी वर्षौं बसि रहेछन् ।
समयमै रुजू गर्न खोजेका
प्रक्रिया र विवरण नमिली बसेका,
मनका फारामहरू
मनका मथिङ्गलहरू
बाझिएका विचारहरू रुजू खोजी रहेछन् ।
जीवनका आशा र भरोसाको बिस्कुनहरू सुकाउन
विगतका धरातलमा नमिलेका,
हिसाबका वासलातहरू
अनियमित रकम कलमहरू
समय मै सम्परीक्षण चाही रहेछन् ।
जीवनका सङ्घर्षका मटानहरूमा
कारबाहीमा टुङ्गो नलागेका दुःखहरू,
आशामा थपिएका किरणहरू
म्याद नाघेका अङ्कहरू
बाँकी रहेका बक्यौताहरू ।
नियमित हुनुपर्ने गरी
सुरक्षित जीवन खोजी रहेछन् ।।
प्रतिक्रिया