काठमाडौं । राष्ट्रिय स्वतन्त्र पार्टीका केन्द्रीय सदस्य तथा सह–प्रवक्ता रमेश प्रसाईंले पार्टीको महामन्त्रीबाट हटाइएका मुकुल ढकाल गाँजाको दुर्व्यसनी रहेको बताएका छन् ।

सामाजिक सञ्जालमा सार्वजनिक प्रसाईंको एउटा भिडियो क्लिपमा उनले ढकाल गाँजाको दुर्व्यसनी रहेको र त्यसकै नसामा अहिले पार्टीका नेताहरूमाथि निराधार लाञ्छना लगाइरहेको आरोप लगाएका छन् ।

‘मेरा मित्र मुकुल ढकाल गाँजाको सेवन गर्नुहुन्छ, कहिलेकाहीँ होइन, दैनिक खानुहुन्छ,’ प्रसाईंको दाबी छ ।

क्यान्सरबाट बच्न ढकालले गाँजा सेवन गरेको बुझाइ सुरुमा आफ्नो रहे पनि उनी पछि त्यसको दुर्व्यसनीमा फसेको र आमाबुवालगायत परिवारका सदस्यलाई निकै दुःख दिएको प्रसाईंको भनाइ छ ।

ढकालमा असाधारण क्षमता भएकै कारण रवि लामिछानेले अवसर दिए पनि अहिले अराजनीतिक संस्कार देखाएर गलत बाटो हिँडेको प्रसाईंले बताए ।

देशका विभिन्न भाग घुमेर तयार पारेको आफ्नो प्रतिवेदन सार्वजनिक गर्नुपर्ने र यसमाथि केन्द्रीय समिति बैठकमा गरिने छलफल लाइभ गर्नुपर्ने माग ढकालले गरेपछि रास्वपामा विवाद उत्पन्न भएको थियो । आफ्नो मागअनुसार केन्द्रीय समिति बैठक लाइभ नगरिएको भन्दै ढकाल बैठकमा मुखमा टेप लगाएर उपस्थित भएपछि रास्वपाले अमर्यादित र अभद्र गतिविधि गरेको भन्दै उनलाई महामन्त्रीबाट हटाएको थियो । आफूमाथि कारबाही भएपछि त्यसको वैधानिकतामाथि प्रश्न उठाउँदै आएका ढकालले पार्टी सभापति रवि लामिछाने र उपसभापति स्वर्णीम वाग्लेको देशभक्तिमाथि गम्भीर आँच आउने निकै संगीन आरोप लगाएका छन् । ढकाल अपुष्ट र अप्रमाणित आरोप लगाएर चरित्र हत्यामा उत्रिएपछि रास्वपाका अन्य नेता त्यसको प्रतिवादमा उत्रिएका छन् ।