काठमाडौं । काठमाडौंको नयाँ सडक (न्युरोड) स्थित फुटपाथ विस्तारविरुद्ध स्थानीयले प्रदर्शन गरेका छन् ।

उच्च अदालत, पाटनको आदेशपछि काठमाडौं महानगरपालिकाले फुटपाथ विस्तार कार्य अघि बढाएपछि स्थानीय त्यसको विरोधमा उत्रिएका हुन् ।

फुटपाथ विस्तारविरुद्ध प्रदर्शनमा उत्रिएका स्थानीयले अहिले काठमाडौं महानगरपालिका र यसका प्रमुख बालेन शाहविरुद्ध नाराबाजी गरिरहेका छन् ।

स्थानीय विरोधमा उत्रिएपछि अहिले न्युरोड क्षेत्रमा सुरक्षाकर्मी बाक्लो रूपमा खटाइएको छ ।

काठमाडौं महानगरपालिकाले यसअघि नै न्युरोडमा फुटपाथ विस्तार थाले पनि संघीय सरकारअन्तर्गतको सडक डिभिजन कार्यालयले हस्तक्षेप गरेर अवरोध गरेको थियो । लगत्तै काठमाडौं महानगरपालिका सडक डिभिजन कार्यालयविरुद्ध उच्च अदालत, पाटन गएकोमा उसले फुटपाथ विस्तारमा अवरोध नगर्न अन्तरिम आदेश दिएको छ ।

उच्च अदालतको आदेशपछि महानगरपालिकाले काम थाले पनि स्थानीय पुनः त्यसको विरोधमा उत्रिएका हुन् ।