काठमाडौं । नेपाली खेलाडी सन्दीप लामिछाने र दीपेन्द्रसिंह ऐरी आबद्ध टिम भ्यानकुभर नाइट्सले क्यानडामा जारी ग्लोबल टी–२० मा पहिलो जित हात पारेको छ । आइतबार सम्पन्न खेलमा भ्यानकुरले मोन्टिरियल टाइगर्सलाई ५ विकेटले हराएको हो ।

सुरुमा बलिङ गरेको भ्यानकुभरले मोन्टिरियललाई १०९ रनमा अलआउट गरेको थियो । जुन लक्ष्य उसले १८.४ ओभरमा सहजै पूरा गर्याे ।

बलिङतर्फ भ्यानकुभरका मोहम्मद अमिरले चार ओभरमा तीन विकेट लिएर १८ रन मात्र दिए । सन्दीपको बलिङ पनि उत्कृष्ट रह्यो । उनले ३.२ ओभरमा दुई विकेट लिदै १४ रन दिएका थिए ।

सात खेलमा एक जित निकालेकाे भ्यानकुभर अंक तालिकाको पुछारमा छ ।

सन्दीप भने सबै खेलमा विकेट लिन सफल भएका छन् । ६ खेलमा उनले आठ विकेट हात पारेका छन् । याेसँगै उनी प्रतियोगितामा धेरै विकेट लिने बलरको सूचीमा उक्लिएका छन् ।  प्रतियोगितामा सबैभन्दा धेरै थोमस जाक्रा र जुनिद सिद्दीगीले ११ विकेट लिएका छन् ।