काठमाडौं । साउने सोमबारलाई भगवान् शिवको प्रिय बार मानिन्छ । साउने सोमबार शिवको पूजाअराधना गर्दा प्रसन्न हुने र पुण्य मिल्ने विश्वास छ ।

त्यसैले हरेक साउने सोमबार शिव मन्दिरहरूमा भक्तजन तथा दर्शनार्थीको घुइँचो लाग्ने गरेको छ । यस वर्षको अन्तिम साउने सोमबार आज बिहानैदेखि शिवका भक्तहरू मन्दिरमा पुगेर पूजा अराधना गरिरहेका छन् ।

आराध्यदेव पशुपतिनाथको मन्दिरमा बिहानैदेखि भक्तजनहरूको घुइँचो लागेको छ । साउने सोमबारको पूजाआजा गर्न आएका दर्शनार्थी तथा बोलबम यात्रामा निस्केकाहरूका लागि बिहानदेखि नै मन्दिरमा सहज रूपमा दर्शनको व्यवस्था मिलाएको पशुपति क्षेत्र विकास कोषले जनाएको छ ।

गोकर्णेश्वर, सन्तानेश्वर, डोलेश्वर, किरातेश्वर, भालेश्वरसहित, काभ्रेपलाञ्चोकको साँगा, तनहुँको देवघाट, म्याग्दीको गलेश्वरलगायत शिवालयमा भक्तजनले बिहानैदेखि स्नान गरी महादेवको पूजा आराधन गरिरहेका छन् ।