काठमाडौं । महोत्तरीमा एक नवविवाहित युवती मृत फेला परेकी छन् । महोत्तरीको जलेश्वर नगरपालिका–८, रमौलकी २० वर्षीया रीना देवी मंगलबार राति मृत्यु भेटिएकी हुन् ।

जिल्ला प्रहरी कार्यालय, महोत्तरीले घरको बरण्डामा रीनाको शव फेला परेको जनाएको छ ।

रीनाका पति रोहनले खाना खाएर सँगै सुतेकी श्रीमतीको स्वास्थ्यमा समस्या आएपछि प्रादेशिक अस्पताल, जलेश्वर लगेकाेमा त्यही मृत्यु भएको र त्यहाँबाट फर्काएर शव घरमा ल्याएको बयान दिएका छन् ।

रीनाका माइती पक्षले भने दाइजोको निहुँमा उनको हत्या भएको आरोप लगाएका छन् । रीनाकाे मुखबाट रगत आउनुका साथै घाँटीलगायत शरीरका भागमा निलडाम रहेको उनीहरूले बताएका छन् । उनीहशले हत्याको किटानी जाहेरीसमेत प्रहरीमा दर्ता गराएका छन् ।

रोहन र रीनाको गत वैशाख १९ गते मात्र विवाह भएको थियो ।

रीनाको शव अहिले पोस्ट्मार्टमका लागि प्रादेशिक अस्पताल, जलेश्वरमा राखिएको छ । पोस्ट्मार्टम रिपोर्टपछि मात्र घटनाबारे थप बताउन सक्ने जिल्ला प्रहरी कार्यालय, महोत्तरीले जनाएको छ ।