काठमाडौं । सहकारीको बचत हिनामिनासम्बन्धमा छानबिन गर्न गठित संसदीय विशेष समितिले गोर्खा मिडिया नेटवर्कका तत्कालीन प्रबन्ध निर्देशकसमेत रहेका राष्ट्रिय स्वतन्त्र पार्टी (रास्वपा) का सभापति रवि लामिछानेसँग शुक्रबार बयान लिने भएको छ ।

समितिका सभापति सूर्य थापाले गोर्खा मिडिया नेटवर्कले गरेको सहकारी रकम अपचलनबारे सोधपुछ गर्न लामिछानेलाई बोलाइएको बताए ।

लामिछानेमाथि जिबी राईसँग मिलेर सहकारीको रकम दुरूपयोग गर्न सघाएको आरोप छ । लामिछानेले भने आफूमाथि लगाइएका यस्ता आरोप मिथ्या भएको भन्दै त्यसको खण्डन गर्दै आइरहेका छन् ।

समितिले आजै गोर्खा मिडिया नेटवर्कका अध्यक्ष छविलाल जोशीलाई पनि बयानका लागि लागि बोलाएको छ ।

नेपाली कांग्रेसले सहकारी ठगी प्रकरणमा संसदीय छानबिन गर्नुपर्ने माग राखेर लगातार संसद् अवरुद्ध पारेपछि गत जेठ १५ गते एमाले सांसद् सूर्य थापा संयोजकत्वमा समिति गठन गरिएको थियो ।

यसबारे छानबिन गरेर तीन महिनाभित्र प्रतिवेदन पेश गर्ने कार्यादेश पाएको समितिले सहकारी ठगी प्रकरणमा जोडिएका व्यक्तिसँग लगातार वयान लिइरहेको छ ।