काठमाडौं । फ्रान्सको पेरिसमा आयोजित प्यारालिम्पिक्समा तेक्वान्दोतर्फ नेपाललाई कांस्य पदक दिलाएकी कीर्तिमानी खेलाडी पलेशा गोवर्धन स्वदेश फर्किएकी छन् ।

पारालिम्पिक्सको इतिहासमै पहिलो पटक नेपाललाई पदक दिलाएकी पलेशा बुधबार स्वदेश फर्किएकी हुन् ।

उनलाई विमानस्थलमा युवा तथा खेलकुदमन्त्री तेजुलाल चौधरी, राष्ट्रिय खेलकुद परिषदका सदस्य सचिव टकंलाल घिसिङ, खेलाडीलगायतले भव्य स्वागत गरेका थिए ।

लगत्तै पलेशालाई नगर परिक्रमा गराइएको छ । एयरपोर्टबाट सुरु नगर परिक्रमा गौशाला, पुरानो बानेश्वर, मैतीदेवी, डिल्लीबजार, बागबजार, भद्रकाली, शहीदगेट, त्रिपुरेश्वर चोक हुँदै राष्ट्रिय खेलकुद परिषद्को प्राङ्गणमा लगेर अन्त्य गरिएको थियो ।