काठमाडौं । सत्तारुढ दलहरु कांग्रेस र एमालेले सरकारको न्यूनतम साझा कार्यक्रम बनाउन चार सदस्यीय कार्यदल गठन गरेका छन् ।
आइतबार साँझ प्रधानमन्त्रीको सरकारी निवास बालुवाटारमा बसेको प्रधानमन्त्री केपी शर्मा ओली र कांग्रेस सभापति शेरबहादुर देउवासहितको बैठकले कार्यदल गठन गरेको हो । कार्यदलमा सदस्यको नाम टुंगो लागिसकेको छैन ।

सरकार गठन भएको दुई महिना हुन लाग्दा पनि न्यूनतम साझा कार्यक्रम बनेको छैन ।

आइतबार साँझ प्रधानमन्त्रीको निवासमा बसेको बैठकमा प्रधानमन्त्री ओली र देउवासहित उपप्रधानमन्त्री एवम् अर्थमन्त्री विष्णुप्रसाद पौडेल, गृहमन्त्री रमेश लेखक, परराष्ट्र मन्त्री आरजु राणा देउवा, एमाले महासचिव शंकर पोखरेल लगायत नेताहरू सहभागी थिए ।