काठमाडौं । लोक सेवा आयोग र शिक्षक सेवा आयोगले विज्ञापन गर्ने पदहरूको तयारी कक्षामा आदिवासी जनजातिहरूले निःशुल्क अध्ययन गर्न पाउने भएका छन् ।

आदिवासी जनजाति उत्थान राष्ट्रिय प्रतिष्ठानले निजामती सेवाको शाखा अधिकृत र नायब सुब्बा तथा शिक्षक सेवा आयोगको प्रावि, निमावि र मावि तहका लागि निःशुल्क तयारी कक्षा सञ्चालन गर्न लागेको हो ।

प्रतिष्ठान ऐन, २०५८ मा सूचीकृत आदिवासी जनजातिका लागि लक्ष्य गरेर सञ्चालन गर्न लागिएको लोक सेवा र शिक्षक सेवाको तयारी कक्षाका निम्ति अनलाइन दरखास्त आह्वान गरिएको प्रतिष्ठानले जनाएको छ । दरखास्त फाराम बुझाउने म्याद ३५ दिनको  छ ।

प्रतिष्ठानका अनुसार, शिक्षक सेवाका पदको तयारी कक्षाका लागि फाराम भरेका सबैले अनलाइन तयारी कक्षामा सहभागी हुन पाउनेछन् भने शाखा अधिकृत र नासुको कक्षाका लागि छनोट परीक्षा हुनेछ । यससम्बन्धी परीक्षाको केन्द्र र मिति पछि तय गरिने प्रतिष्ठानले जनाएको छ ।

शिक्षक सेवाले माग गर्ने पदहरूको परीक्षा अनलाइनबाट भए पनि शाखा अधिकृत र नासुको भने भौतिक रूपमा गर्ने प्रतिष्ठानको तयारी छ ।