काठमाडाैं । एनआइसी एसिया बैंक लिमिटेडले आफ्नो स्वामित्वमा रहेको चार वटा कम्पनीको ३१ करोड रुपैयाँ बराबरको संस्थापक सेयर लिलामीमार्फत बिक्री गर्ने भएको छ ।

बैंकल एक सूचना जारी गर्दै सेयर बिक्री गर्नेबारे जानकारी गराएको हो । सूचनाअनुसार बैकले सिटिजन्स इन्भेष्टमेन्ट ट्रस्ट (सीआईटी) ५० हजार कित्ता, सूर्योदय वोमी लघुवित्तको ५१ हजार ८०५ कित्ता, सूर्यज्योति लाइफको ८ लाख ९३ हजार ८२५ कित्ता र  नेपाल इन्फ्राक्चर बैंक (निफ्रा) को ९ लाख ६५ हजार कित्ता गरी कुल १९ लाख ६० हजार ६३० कित्ता सेयर लिलामीमार्फत बिक्रीमा राखेको छ ।

इच्छुक योग्य लगानीकर्ताले सूचना प्रकाशित भएको मितिदेखि मंसिर ८ गतेसम्म गोप्य शिलबन्दी बोलपत्र पेस गर्नुपर्नेछ । योग्य लगानीकर्ताले अधिकतम सम्पूर्ण र न्युनतम पाँच हजार कित्ताको लागि आवेदन दिन सकिनेछ ।

सीआईटीको न्युनतम ७७९ रुपैयाँ, सूर्योदय वोमी लघुवित्तको न्यूनतम मूल्य २९७ रुपैयाँ, सूर्यज्योति लाइफको १७८ रुपैयाँ र निफ्राको १०१ रुपैयाँ न्यूनतम मूल्य निर्धारण गरिएको छ ।

बोलपत्र आवेदन काठमाडाैं, थापाथली ट्रेड टावरस्थित एनआइसी एसिया क्यापिटलको कार्यालय वा थापाथलीस्थित एनआइसी एसिया बैंकको कर्पोरेट कार्यालयसँगै विराटनगर, वीरगन्ज, पोखरा, बुटवल, धनगढी र सुर्खेत शाखा कार्यालयमा बुझाउन सकिनेछ ।