काठमाडौं । नेपाल दूरसञ्चार प्राधिकरणले एक इन्टरनेट सेवा प्रदायकको अनुमतिपत्र खारेज गरेको छ । तोकिएको समयभित्र नवीकरण नगरेपछि प्राधिकरणले नेट म्याक्स टेक्नोलोजिज प्रालिको अनुमतिपत्र खारेज गरेको हो ।

नेट म्याक्सले तोकिएको समयभित्र नवीकरणका लागि निवेदन नदिएकाले दूरसञ्चार ऐन, २०५३ अनुसार अनुमतिपत्र खारेज गरेको प्राधिकरणले जनाएको छ ।
नेट म्याक्सले २०६६ असोज २९ देखि इमेलसहितको इन्टरनेट सेवाको अनुमति पाएको थियो ।

प्राधिकरणले नियमानुार भुक्तानी गर्नुपर्ने रकम आगामी ३० दिनभित्र भुक्तानी गर्न पनि निर्देशन दिएको छ । तोकिएको समयभित्र आर्थिक दायित्व भुक्तान नगरेमा कानूनअनुसार कारबाही गर्ने उसको चेतावनी छ ।