काठमाडौं । नेकपा (एमाले) ले फरक मत राख्दै आइरहेका नेता भीम रावललाई साधारण सदस्यसमेत नरहने गरी पार्टीबाट निष्कासित गरेको छ । स्थायी समिति सदस्य बिन्दा पाण्डे र उषाकिरण तिम्सिनालाई भने ६ महिनाका लागि पार्टी जिम्मेवारीबाट निलम्बन गरिएको छ ।

बुधबार बसेको एमाले सचिवालय बैठकले पार्टी अनुशासनविपरीतको कार्य गरेको ठहर गर्दै तीन नेतामाथि कारबाही गर्ने निर्णय लिएको हो ।

एमाले उपमहासचिव प्रदीप ज्ञवालीले रावलले निरन्तर पार्टीलाई कमजोर पार्ने अभिव्यक्ति दिएकाले साधारण सदस्यसमेत नरहने गरी कारबाही गरिएको जानकारी दिए ।

पाण्डे र तिम्सिनाले पार्टी अनुशासनविपरीत कार्य गरेको स्वीकार नगरेकाले ६ महिनाका लागि निलम्बन गरिएको सो पार्टीको भनाइ छ ।

व्यवसायी मीनबहादुर गुरुङले पार्टी कार्यालय निर्माणका लागि दिएको जग्गा एमालेले ग्रहण गरेपछि त्यसलाई स्वीकार गर्न नहुने अभिव्यक्ति तीन नेताले दिएका थिए । यसरी विवादास्पद व्यवसायीबाट जग्गा लिँदा स्वार्थको द्वन्द्व हुने र यसले स्वाभिमानी कार्यकर्ताको शिर झुक्ने उनीहरूको भनाइ थियो । तर यस्ता अभिव्यक्ति लगत्तै एमालेले तीन नेतालाई स्पष्टीकरण सोधेको थियो । रावलले स्पष्टीकरणको जवाफ नै दिएका थिएनन् भने पाण्डे र तिम्सिनाले बुझाएका थिए ।

आफूमाथि कारबाहीकोबारे टिप्पणी गर्दै रावलले यसलाई एमाले अध्यक्ष केपी शर्मा ओलीको निरंकुश, स्वेच्छाचारी, तानाशाही मनस्थितिको उपज भएको बताए ।

त्यस्तै, बिन्दा पाण्डेले व्यवसायीबाट कार्यालय निर्माण गर्न जग्गा लिन नहुने आफ्नो अभिव्यक्ति गलत नभएको दोहोर्याएकी छन् ।