काठमाडौं । विद्युत् आपूर्तिमा गरिएको कटौतीले गम्भीर समस्या खडा गरेपछि चिलीको सेना सडकमा निस्किएकोे छ ।

बिजुली कटौतीले चिलीका अधिकांश भाग प्रभावित भइरहेका बेला सुरक्षा चुनौतीलाई दर्शाउँदै त्यहाँको सेना सडकमा निस्किएको हो ।

यसअघि देशव्यापी बिजुली कटौतीपछि प्रभावित क्षेत्रहरूमा कर्फ्यू समेत लगाइएको थियो ।

चिलीका ८० लाख घरपरिवारमा अहिले बिजुली कटौती गरिएको छ । बिजुली कटौतीपछि यातायात, स्वास्थ्य सेवालगायत क्षेत्र नराम्ररी प्रभावित भएका छन् ।

दक्षिण अमेरिकाको सबैभन्दा ठूलो संगीत महोत्सव द भिना देल मार विद्युत् आपूर्ति कटौतीकै कारण रद्द गरिएको छ।

राजधानी सान्टियागोका केही भागहरूमा भने अहिले आपूर्ति पुनर्स्थापित गरिएको छ।

चिलीमा अहिले यातायात सेवा नराम्ररी प्रभावित भएको छ भने देशका अस्पताल र जेलहरूमा जेनेरेटरमार्फत बिजुली आपूर्ति गरिएको छ ।

चिलीमा विद्युत् संकट देखापर्नुलाई त्यहाँको सरकारले प्रणालीगत विफलता मानेको छ ।

चिलीका राष्ट्रपति गेब्रियल बोरिकले टेलिभिजन सम्बोधन गर्दै विद्युत् कटौतीले ८० लाख घरहरू प्रभावित भएको जनाएका छन् । त्यसमध्ये आधा घरहरूमा बिजुली आपूर्ति पूर्ववत् गरिएको उनको भनाइ छ ।