काठमाडौं– २०४८ यता नेपालमा वृद्ध उमेर भएका मानिसको जनसंख्या तीन गुणाले बढेको छ । राष्ट्रिय तथ्यांक कार्यालयले सार्वजनिक गरेको नेपालमा बुढ्यौलीको अवस्था (प्रतिवेदन)अनुसार वि.सं. २०४८ देखि २०७८ सम्मको अवधिमा नेपालमा नेपालमा तीन गुणाले वृद्ध मानिसको संख्या वृद्धि भएको हो ।

प्रतिवेदनअनुसार २०६८ सालमा नेपालको पहाडी क्षेत्रमा बुढ्यौली जनसंख्या २५.७ प्रतिशत रहेकोमा २०७८ सालमा सो संख्या वृद्धि भएर ४३.६ प्रतिशत पुगेको छ । तर, हिमाली र पहाडी क्षेत्रमा बुढ्यौलीको संख्यामा भएको वृद्धिदरको तुलनामा तराई क्षेत्रमा कम देखिएको कार्यालयले जनाएको छ ।

त्यस्तै, प्रदेशगत हिसाबले गण्डकी प्रदेशमा सबैभन्दा धेरै वृद्धहरूको संख्यामा वृद्धि भएको कार्यालयको प्रतिवेदनमा उल्लेख छ । जिल्लागत हिसाबले भने मनाङमा सबैभन्दा धेरै ९०.३ र जाजरकोटमा सबैभन्दा कम १८.७ मान पुगेको कार्यालयले जनाएको छ ।

प्रतिवेदनअनुसार वृद्धहरूमध्ये ५१ प्रतिशत वृद्ध अझै पनि आर्थिक रूपले सक्रिय रहेको र ती मध्ये अधिकांश कृषि क्षेत्रमा संलग्न रहेका छन् ।