काठमाडौं । सरकारले एक इन्टरनेट सेवाप्रदायकको अनुमति पत्र खारेज गरेको छ ।

नेपाल दूरसञ्चार प्राधिकरणले चेरी वल्र्ड कम्युनिकेशन प्रालि, रविभवनको अनुमतिपत्र खारेज गरिदिएको हो ।

सेवाको अनुमतिपत्र नवीकरणका लागि तोकिएको समयमा निवेदन नदिएकाले चेरी वल्र्डको लाइसेन्स खारेज गरिएको प्राधिकरणले जनाएको छ ।

दूरसञ्चार ऐन, २०५३ को दफा २५(५) मा अनुमतिपत्र नवीकरणका लागि समयमै निवेदन नदिएमा खारेज गर्न सकिने प्रबन्ध छ ।

प्राधिकरणले एक सूचना जारी गर्दै आफूले तिर्न बुझाउन पर्ने रकम सूचना प्रकाशित भएको ३० दिनभित्र भुक्तानी गर्न चेरीलाई निर्देशन दिएको छ । अन्यथा प्रचलित कानूनअनुसार कारबाही प्रक्रिया अघि बढ्ने उसको चेतावनी छ ।