काठमाडौं– शिक्षा, विज्ञान तथा प्रविधिमन्त्री रघुजी पन्तले असार १५ गतेसम्म विद्यालय शिक्षा सम्बन्धी ऐनलाई प्रतिनिधिसभाबाट पारित गर्ने प्रयत्न भइरहेको बताएका छन् ।

शनिबार आयोजित सामुदायिक क्याम्पसहरूको दिगोपन र उत्कृष्टतासम्बन्धी राष्ट्रिय संवाद कार्यक्रमलाई सम्बोधन गर्दै उनले असार १५ गतेसम्म ऐन पारित गर्ने गरी सरकार अघि बढिरहेको बताएका हुन् ।

‘असार १५ गतेसम्ममा विद्यालय शिक्षासम्बन्धी ऐनलाई हामीले प्रतिनिधिसभाबाट सकेसम्म पारित गरौँ भन्ने मेरो प्रयत्न छ,’ शिक्षामन्त्री पन्तले भने । शिक्षामन्त्री पन्तले १२ कक्षा पास हुने बित्तिकै विद्यार्थीलाई देश बाहिर पठाउनु नहुनेमा पनि जोड दिए ।

‘साँच्चै भन्नुहुन्छ भने मेरो मनमा लागेको कुरा के हो भने एउटा राष्ट्रिय बहस होस्, प्लस टु पास गरेको विद्यार्थीलाई कुनै पनि हालतमा देश बाहिर पठाउनु हुँदैन,’ पन्तले भने ।

कतिपय कन्सलटेन्सीहरूले १० देखि १५ लाख रुपैयाँ लिएर कोरिया जानासाथ लाख रुपैयाँको जागिर पाइन्छ भनेर विद्यार्थी पठाउने गरेको भन्दै उनले आपत्ति जनाए ।