काठमाडौँ । आज शनिबार राति सुदूरपश्चिम लगायत देशका तराई भू-भागको एक, दुई स्थानमा मेघगर्जन, चट्यांगसहित हल्का वर्षाको सम्भावना रहेको मौसम पूर्वानुमान महाशाखाले जनाएको छ ।

यसैगरी, बागमती, गण्डकी, लुम्बिनी, कोशी र कर्णाली प्रदेशका हिमाली र पहाडी भू-भागमा भने मध्यम वर्षाको सम्भावना छ । महाशाखाकाअनुसार हाल नेपालमा पश्चिमी न्यून चापीय प्रणाली र स्थानीय वायुको साथै नेपालको पूर्वी भू-भाग नजिक तल्लो वायुमण्डलमा न्यून चापीय क्षेत्रको प्रभाव रहेको छ ।

अहिले कोशी, बागमती र लुम्बिनी प्रदेशका थोरै स्थान तथा गण्डकी र कर्णाली प्रदेशको एक, दुई स्थानमा मध्यमसम्मको वर्षा भइरहेको छ । भोलि आइतबार र पर्सी सोमबार देशका हिमाली र पहाडी भू-भागमा साधारणतया र तराई भू-भागमा आंशिक बादल लाग्ने महाशाखाले जनाएको छ ।