काठमाडौं । भीषण बाढीका कारण मृत्यु हुनेको संख्या ७५२ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार दिउँसो १ बजेसम्म विभिन्न जिल्लाबाट ७५२ जनाको शव फेला परेको पुष्टि भएको हो।

बाढीबाट सबैभन्दा बढी प्रभावित चितवनमा २५९ जनाको शव फेला परेको छ। यस्तै, नवलपरासी पूर्वमा १८४, नवलपरासी पश्चिममा १००, नुवाकोटमा ५२, धादिङमा ५०, गोरखामा ५८, तनहुँमा ३६ र रसुवामा १३ जनाको मृत्यु भएको प्राधिकरणले जनाएको छ।

बाढीमा परी २३९ जना घाइते भएका छन्। उनीहरूको विभिन्न स्वास्थ्य संस्थामा उपचार भइरहेको छ।

प्राधिकरणका अनुसार बाढीपछि अझै २ हजार ५०२ जना सम्पर्कविहीन छन्। बेपत्तामध्ये जलविद्युत् आयोजनामा कार्यरत ९३३ जना, ५९२ जना विदेशी नागरिक तथा उनीहरूसँगै रहेका १२७ जना नेपाली छन्।

यस्तै, रसुवाका ५६२ र नुवाकोटका ११५ जना स्थानीय बासिन्दा पनि सम्पर्कविहीन रहेको जनाइएको छ। सुरक्षाकर्मीतर्फ नेपाली सेनाका ४५, नेपाल प्रहरीका २५ र सशस्त्र प्रहरीका १३ जना बेपत्ता छन्।

हालसम्म ८ हजार ७३० जनाको जीवितै उद्धार गरिएको छ। उद्धार गरिएकामध्ये सशस्त्र प्रहरीले ३५७, नेपाली सेनाले २ हजार ९७४ र नेपाल प्रहरीले २ हजार ६९९ जनाको उद्धार गरेका छन्।

यस्तै, जलविद्युत् आयोजनाका सुरुङमा फसेका २७९ जनालाई हेलिकप्टरमार्फत उद्धार गरिएको छ। हवाई उद्धारबाट २ हजार ८४५ नेपाली र २३६ विदेशी नागरिकको उद्धार गरिएको प्राधिकरणले जनाएको छ।

खोज तथा उद्धार कार्यका लागि नेपाली सेनाका ८ हजार ३१९, नेपाल प्रहरीका ७ हजार २९३ र सशस्त्र प्रहरीका ४ हजार २०३ गरी कुल १९ हजार ८९५ सुरक्षाकर्मी प्रभावित क्षेत्रमा परिचालन गरिएको छ।