स्वास्थ्य सेवा विभागका पोषण शाखा प्रमुख लीलाविक्रम थापाका अनुसार यो कार्यक्रमबाट करिब २१ लाख बालबालिकाले भिटामिन ‘ए’ र करिब २० लाख बालबालिकाले जुकाको औषधि पाउनेछन्। थापाले अभिभावकहरूलाई आफ्ना बालबालिकालाई पायक पर्ने स्थानमा लगेर औषधि खुवाउन आग्रह गरेका छन्।

यस अभियानका लागि देशभर ५२ हजार महिला स्वास्थ्य स्वयंसेविका र १० हजार स्वास्थ्यकर्मी परिचालन गरिएको छ। सरकारले बालबालिकामा देखिने स्वास्थ्य जटिलता तथा कुपोषणको जोखिम न्यूनीकरण गर्ने उद्देश्यले प्रत्येक वर्ष कात्तिक र वैशाख महिनामा यो कार्यक्रम सञ्चालन गर्दै आएको छ। नेपालमा विसं २०५० देखि भिटामिन ‘ए’ क्याप्सुल र विसं २०५६ देखि जुकाको औषधि नियमित रूपमा निःशुल्क वितरण गरिँदै आएको छ।